இந்திய அணி தேர்வுக் குழுவின் பரிசோதனை எலியா சஞ்சு சாம்சன்?

இந்திய கிரிக்கெட் ரசிகர்கள் மத்தியில் சஞ்சு சாம்சனுக்கு என்று தனி ரசிகர் பட்டாளம் உள்ளது. கேரளாவைச் சேர்ந்த இவர், சமீப காலமாகவே ரசிகர்களின் கவனத்தை ஈர்த்த கிரிக்கெட் வீரர்களில் ஒருவராக உருவெடுத்து வருகிறார். குறிப்பாக இந்திய டி20 மற்றும் ஒருநாள் அணியில் சஞ்சு சாம்சன் சிறப்பாக செயல்பட்டு அனைவரது கவனத்தையும் தன் பக்கம் திருப்பியுள்ளார். அதிலும் குறிப்பாக கடந்தாண்டு டி20 கிரிக்கெட்டில் தொடக்க வீரராக அபாரமாக விளையாடிய சாம்சன் அடுத்தடுத்து மூன்று சாதங்களையும் விளாசி, அணியின் தவிர்க்க முடியாத வீரர்களில் ஒருவராகவும் மாறியுள்ளார்.

சஞ்சு சாம்சனின் தந்தை டெல்லியில் காவலராக பணியாற்றி வந்ததன் காரணமாக, சஞ்சு தனது ஆரம்ப கால கிரிக்கெட்டை டெல்லியில் தொடங்கினார். இருப்பினும் அவரால் துருவ் பண்டோவ் கோப்பை என்றழைக்கப்படும் 13 வயதுக்குட்பட்டோருக்கான கிரிக்கெட் போட்டிகளில் டெல்லி அணிக்காக விளையாடும் வாய்ப்பை பெறமுடியவில்லை. இதனையடுத்து சஞ்சுவின் தந்தை டெல்லி காவல்துறையில் இருந்து தன்னார்வ ஓய்வு பெற்றதையடுத்து, அவர்கள் குடும்பத்தோடு கேரளாவிற்கு குடிபெயர்ந்தனர். அதன்பின் சஞ்சு சாம்சன் கேரளா அண்டர்13 அணியில் தேர்வு செய்யப்பட்டு தனது கிரிக்கெட் வாழ்வை தொடங்கினார்.

அதனைத் தொடர்ந்து அவர் கேரளா அண்டர்16 அணியில் இடம் பெற்றதுடன், கோவா அணிக்கு எதிரான போட்டியில் இரட்டை சதத்தையும் விளாசி தனது திறனை உலகறியச் செய்தார். அதன்பின் கேரளாவிற்காக ரஞ்சி கோப்பை தொடரில் விளையாட தகுதிபெற்ற சஞ்சு சாம்சன், தொடர்ந்து விஜய் ஹசாரே கோப்பை, சையத் முஷ்டாக் அலி கோப்பை தொடர்களிலும் கேரளாவிற்காக விளையாடி தனது பேட்டிங் திறனை வெளிப்படுத்தியதுடன், பங்கேற்ற அனைத்து தொடர்களிலும் கேரளாவிற்காக அதிக ரன்களைக் குவித்த டாப் 3 வீரர்கள் பட்டியலிலும் தனது முத்திரையைப் பதித்தார்.

உள்ளூர் போட்டிகளில் தொடர்ந்து சிறப்பாக செயல்பட்டுவந்த சஞ்சு சாம்சனுக்கு, 2012ஆம் ஆண்டு ஐபிஎல் தொடரில் விளையாடும் வாய்ப்பு கிடைத்தது. 2012ஆம் ஆண்டு கொல்கத்தா நைட் ரைடர்ஸ் அணியால் ஒப்பந்தம் செய்யப்பட்ட சஞ்சுவுக்கு, அந்த சீசனில் எந்தவொரு போட்டிகளிலும் விளையாடும் வாய்ப்பு கிடைக்கவில்லை. அதன்பின் அடுத்த சீசனுக்கு முன்னதாக கேகேஆர் அணி அவரை விடுவித்த நிலையில், 2013ஆம் ஆண்டு ஐபிஎல் தொடரில் ராஜஸ்தான் ராயல்ஸ் அணிக்காக விளையாடும் வாய்ப்பை பெற்றார். மேலும் அத்தொடரில் கிங்ஸ் லெவன் பஞ்சாப் அணிக்கு எதிரான போட்டியின் மூலம் தனது அறிமுகத்தையும் பெற்றிருந்தார்.

தனது அறிமுக ஆட்டத்தில் பெரிதளவில் ரன்களைச் சேர்க்காவிட்டாலும், இரண்டாவது ஆட்டத்தில் அரைசதம் கடந்ததுடன் 63 ரன்களையும் சேர்த்து மிரட்டினார். இதன் மூலம் ஐபிஎல் தொடர் வரலாற்றில் மிக இளம் வயதில் அரைசதம் கடந்த வீரர் என்ற சாதனையையும் அவர் படைத்ததுடன், அந்த சீசனில் மட்டும் 10 இன்னிங்ஸில் 206 ரன்களையும், 6 ஸ்டம்பிங்களையும் செய்து வளர்ந்துவரும் வீரருக்கான விருதையும் வென்று அசத்தினார். அதன்பின் நடைபெற்ற சாம்பியன்ஸ் லீக் டி20 தொடரில் மும்பை இந்தியன்ஸுக்கு எதிரான தனது அறிமுக ஆட்டத்திலேயே அவர் அரைசதம் கடந்து, அத்தொடரில் அரைசதம் விளாசிய மிக இளம் வயது வீரர் என்ற பெருமையையும் பெற்றார்.

ஐபிஎல் தொடரில் அபாரமான ஆட்டத்தை வெளிப்படுத்தி வந்த சஞ்சு சாம்சனுக்கு, 2014ஆம் ஆண்டு நடைபெற்ற இங்கிலாந்து தொடருக்கான ஒருநாள் மற்றும் டி20 போட்டிகளுக்கான இந்திய அணியில் இடம் கிடைத்தது. இருப்பினும் அத்தொடரில் அவருக்கு பிளேயிங் லெவனில் வாய்ப்பு வழங்கப்படவில்லை. அதனைத் தொடர்ந்து நடைபெற இருந்த வெஸ்ட் இண்டீஸ் தொடருக்கும் சஞ்சு சாம்சன் தேர்வு செய்யப்பட்ட நிலையில், அத்தொடர் ரத்து செய்யப்பட்டது. அதன்பின், 2015ஆம் ஆண்டு நடைபெற்ற ஐசிசி ஒருநாள் உலகக் கோப்பை தொடருக்கான 30பேர் அடங்கிய முதற்கட்ட இந்திய அணியில் சஞ்சுவின் பெயரும் இடம்பெற்றிருந்தது.

ஆனால் அவரால் இறுதிக்கட்ட அணியில் தேர்வாகமுடியவில்லை. இவ்வாறு சர்வதேச அறிமுகத்திற்காக காத்திருந்த சஞ்சு சாம்சனுக்கும், கடந்த 2015ஆம் ஆண்டு ஜிம்பாப்வேவுக்கு எதிரான டி20 தொடரின் மூலம் சர்வதேச கிரிக்கெட்டில் அறிமுகமாகும் வாய்ப்பு கிடைத்தது. தனது அறிமுக ஆட்டத்தில் 19 ரன்களைச் சேர்த்த சஞ்சு சாம்சனுக்கு, அதன்பின் கிட்டத்திட்ட 4 ஆண்டுகள் இந்திய அணியில் வாய்ப்பு கிடைக்காமல் தடுமாறினார். இறுதில் 2019ஆம் ஆண்டு வங்கதேச டி20 தொடரின் மூலம் கம்பேக் கொடுக்கும் வாய்ப்பு கிடைத்த நிலையிலும், பிளேயிங் லெவனில் விளையாடும் வாய்ப்பு மறுக்கப்பட்டது.

ஒருபக்கம் இந்திய அணியில் சஞ்சு சாம்சனுக்கு வாய்ப்பு மறுக்கப்பட்டு வந்த நிலையில், உள்ளூர் போட்டிகள் மற்றும் ஐபிஎல் தொடரில் தொடர்ந்து அபாரமான ஆட்டத்தை வெளிப்படுத்தி ரசிகர்களின் மனதை வென்றார். இதனால் ஒவ்வொரு தொடரின் போதும் சஞ்சு சாம்சனின் பெயர் இந்திய அணியில் இடம் பெறும் என்ற எதிர்பார்ப்புடன் காத்திருந்த ரசிகர்களுக்கு, ஒவ்வொரு முறையும் ஏமாற்றம் மட்டுமே மிஞ்சியது. இருப்பினும் அதுகுறித்து கவலை கொள்ளாத சஞ்சு, தனது அதிரடியான பேட்டிங்கை மட்டுமே வெளிப்படுத்தி ரசிகர்களைக் குஷிப்படுத்தினார்.

அதிலும் குறிப்பாக 2017ஆம் ஆண்டு டெல்லி கேபிட்டல்ஸ் அணிக்காக விளையாடிய சஞ்சு சாம்சன், ரைஸிங் புனே சூப்பர் ஜெயண்ட்ஸுக்கு எதிரான போட்டியில் தனது முதல் ஐபிஎல் சதத்தை விளாசி அசத்தினார். அதனைத்தொடர்ந்து அடுத்த சீசனில் மீண்டும் ராஜஸ்தான் ரயால்ஸுக்கு திரும்பிய அவர், சன்ரைசர்ஸ் ஹைதராபாத அணிக்கு எதிரான ஆட்டத்தில் தனது இரண்டாவது ஐபிஎல் சதத்தை விளாசியதுடன், இந்திய அணி தேர்வாளர்களை தனது அதிரடியான பேட்டிங்கின் மூலம் கேள்விக்கேட்டார்.

இதனைத் தொடர்ந்து 2019ஆம் ஆண்டு முதல் சஞ்சு சாம்சன் அவ்வபோது இந்திய அணியில் தேர்வு செய்யப்பட்டிருந்தாலும், தனக்கு கிடைத்த வாய்ப்புகளை அவரால் சரியாக பயன்படுத்திக்கொள்ள முடியவில்லை. இருப்பினும் சஞ்சு மீது வைத்திருந்த நம்பிக்கை காரணமாக 2021ஆம் ஆண்டு ராஜஸ்தான் ராயல்ஸ் அணி அவரை கேப்டனாக நியமித்திருந்தது. அந்தாண்டு ஐபிஎல் தொடரின் முதல் போட்டியிலேயே சதம் விளாசியதுடன், ஐபிஎல் தொடரில் புதிய சாதனையையும் படைத்தார். மேலும் அத்தொடரில் அவர் 14 போட்டிகளில் விளையாடி 484 ரன்களையும் குவித்திருந்தார்.