ஒரே மொழி, ஒரே நாமம் நடக்கவே நடக்காது - கமல் திட்டவட்டம்

அமைச்சரை தொடர்ந்து பேசிய கமல் ஹாசன், "விளையாட்டு என்பது தேச ஆரோக்கியம், வலிமை, மன உறுதியின் அடையாளம். விளையாட்டு தியாகத்தின் அடையாளமாகவும் இருக்கும். விளையாட்டு வீரரின் தியாகம் புரிந்தால் ஜனநாயகம் புரிந்துவிடும்.

விளையாட்டு மட்டுமல்ல. ஒரே மொழி, ஒரே ஆடை, ஒரே உணவு என எதிலும் ஒன்றே ஒன்று என்பது போல் இருக்க முடியாது. ஒரே பொட்டு, ஒரே நாமம் என்பதெல்லாம் நடக்கவே நடக்காது.

வாழ்க்கையில் ஒரு பகுதி கல்வி, அதேபோல ஆரோக்கியமும் தான். அதற்கு முக்கியம் விளையாட்டு தான். எனக்கு பெரும் ஆசான்கள் இருந்துள்ளார்கள். யூ.கே.ஜியில் எனக்கு தமிழ் கற்றுத் தந்தவர்கள் கலைஞர், பாரதிதாசன், சிவாஜி கணேசன் தான்," என்றார்.

மேலும் பேசிய அவர், "உலகை மாற்றும் வல்லமை விளையாட்டிற்கு உண்டு, சினிமா திரையரங்குகளில் தான் முதலில் சாதி ஒழிந்தது என்று நம்புகிறேன். அது வீதிக்கும் வர வேண்டும், என் காலத்திலேயே அது நடக்க வேண்டும் என்பதும் என் விருப்பம்.

மக்கள் நீதி மய்யத்தை சேர்ந்தவர்களுக்கு உரிய அங்கீகாரம் கிடைக்கும், பொறுமையாக இருங்கள் என கூறி வந்தேன். தற்போது அந்த அங்கீகாரம் கிடைத்துள்ளது. பிழைப்புக்காக கவி என்று இல்லாமல், நீங்களும், நாடும் முன்னேற வேண்டும் என்று படித்தால் இந்தியா வல்லரசு ஆகும். பெரும்பான்மை என்பது ஜனநாயகம் அல்ல; எல்லோரையும் பாதுகாப்பது தான் ஜனநாயகம். கல்வி, விளையாட்டு, அரசியலுக்கு இளைஞர்கள் வர வேண்டும்.

தமிழ்நாட்டிலிருந்து மிக விரைவில் ஒலிம்பிக் வீரர்கள் வரப் போகிறார்கள். படிப்பத்தோடு மட்டுமல்லாமல் தனித்திறமைகளை வளர்த்து கொள்ள வேண்டும். உலக மேடைகளில் அனைத்து துறைகளிலும் வெல்வது தான் வல்லரசின் அடையாளம்; அதை நோக்கி நாம் நகர வேண்டும்” என்று கமல் ஹாசன் கூறினார்.