திரையுலகில் அரை நூற்றாண்டு பயணம்: சென்னை சர்வதேச திரைப்பட விழாவில் ரஜினிக்கு விருது

ரஜினிகாந்தின் 50 ஆண்டுகால திரையுலக பயணத்தை கௌரவிக்கும் வகையில் சென்னை சர்வதேச திரைப்பட விழாவில் வழங்கப்பட்ட விருதை ரஜினிகாந்தின் சார்பாக அவரது மகள் ஐஸ்வர்யா ரஜினிகாந்த் பெற்றுக் கொண்டார்.

ராயப்பேட்டையில் உள்ள சத்தியம் திரையரங்கில் INDO CINE APPRECIATION FOUNDATION சார்பில் தமிழ்நாடு அரசின் பங்களிப்புடன் 23-வது சென்னை சர்வதேச திரைப்பட விழாவின் தொடக்க நிகழ்ச்சி நடைபெற்றது. இந்த நிகழ்ச்சியில் சிறப்பு விருந்தினராக தமிழ் வளர்ச்சி செய்தி துறை அமைச்சர் சாமிநாதன், திரைப்பட நடிகை சிம்ரன் உள்ளிட்டோர் கலந்து கொண்டு நிகழ்ச்சியை தொடக்கி வைத்தனர். இந்த விழாவில் கௌரவ விருந்தினராக ஐஸ்வர்யா ரஜினிகாந்த் கலந்து கொண்டார்.

ரஜினியின் 50 ஆண்டுகால திரையுலக பயணத்தை கௌரவிக்கும் விதத்தில், சென்னை சர்வதேச திரைப்பட விழாவில் அவருக்கு வழங்கப்பட்ட விருதை அவரது மகள் ஐஸ்வர்யா ரஜினிகாந்த் பெற்றுக் கொண்டார்.

விழாவில் அவர் பேசும்போது, "உலகம் முழுவதும் ஒவ்வொரு தனி நபரும் எனது தந்தை ரஜினிகாந்தின் பிறந்தநாளை தங்களின் வழியில் கொண்டாடி வருகின்றனர். அனைவருடனும் இணைந்து ரஜினிகாந்தும் தன்னுடைய பிறந்தநாளை கொண்டாடி வருகிறார்" என்று ஐஸ்வர்யா ரஜினிகாந்த் கூறினார்.

இதனைத்தொடர்ந்து அமைச்சர் சாமிநாதன் பேசுகையில், ”திரைப்படத்துறையினருக்கு சொந்த வீடு என்பது ஒரு நீண்டகால கனவாக இருந்தது. அந்தக் கனவு நினைவாக்கும் வகையில் கடந்த 2010ஆம் ஆண்டு பையனூரில் 90 ஏக்கர் நிலத்தை கலைஞர் ஒதுக்கீடு செய்தார். திரைப்படத்துறைக்கும் திராவிட இயக்கத்திற்கும் உள்ள உறவு வரலாற்றில் பொறிக்கப்பட்டவை.

பூந்தமல்லி அருகே சுமார் 150 ஏக்கர் நிலப்பரப்பில் 500 கோடி ரூபாய் மதிப்பில் வி.எஃப்.எக்ஸ் அனிமேஷன் வசதியுடன்கூடிய திரைப்பட நகரம் அமைக்கும் பணிகள் துவங்கி உள்ளன. தமிழ்நாடு அரசு வழங்கும் திரைப்பட விருதுகளை பொறுத்தவரை இந்த அரசு பொறுப்பேற்ற பிறகு ஏறத்தாழ 2009ஆம் ஆண்டில் இருந்து 2015 வரை மீதம் இருந்த விருதுகள் வழங்கப்பட்டுள்ளன. 2016 முதல் 2022 வரையான விருதுகள் விரைவில் வழங்கப்படவுள்ளன" என்றார்.