ஆஸ்கரில் பெண் இயக்குநர்களின் படங்கள் புறக்கணிப்பு
Admin
பிரபல ஹாலிவுட் நடிகை நடாலி போர்ட்மேன். பல படங்களில் நடித்திருக்கும் இவர், சில படங்களைத் தயாரித்துள்ளார். ‘ஏ டேல் ஆஃப் லவ் அண்ட் டார்க்னஸ்’ உள்பட சில படங்களை இயக்கியுள்ள இவர், இப்போது ‘த கேலரிஸ்ட்’ என்ற படத்தைத் தயாரித்து நடித்துள்ளார்.
இப்படம் அமெரிக்காவில் நடைபெற்ற சன்டான்ஸ் திரைப்பட விழாவில் திரையிடப்பட்டது. அப்போது செய்தியாளர்களிடம் பேசிய அவர், ஆஸ்கரில் பெண் இயக்குநர்களின் படங்கள் புறக்கணிக்கப்பட்டுள்ளதாகத் தெரிவித்துள்ளார்.
ஆஸ்கர் விருது வழங்கும் விழா மார்ச் 15-ம் தேதி நடைபெற இருக்கிறது. இதில் இடம்பெற்ற திரைப்படங்களின் இறுதிப் பட்டியல் சமீபத்தில் வெளியிடப்பட்டது. இந்நிலையில் நடாலி போர்ட் மேன் அளித்துள்ள பேட்டியில், “இந்த ஆண்டு நான் பார்த்த சிறந்த படங்களில் பல, பெண்கள் இயக்கியவை.
‘ஸாரி பேபி’, ‘லெஃப்ட்-ஹேண்டட் கேர்ள்’, ‘ஹெடா’, ‘தி டெஸ்டமென்ட் ஆஃப் ஆன் லீ’ ஆகிய படங்கள் இந்தாண்டு பலரால் விரும்பப்பட்டப் படங்கள். ஆனால் அவற்றுக்குத் தகுதியான பாராட்டுகள் கிடைக்கவில்லை. விருதுகள் வழங்கி அங்கீகரிக்காததால் அப்படங்கள் ஒவ்வொரு மட்டத்திலும் தடைகளை எதிர்கொள்கின்றன” என்று தெரிவித்துள்ளார்.
குளோயி ஜாவோ என்ற பெண் இயக்குநர் இயக்கியுள்ள ‘ஹாம்நெட்’ ஆஸ்கரில் 8 பரிந்துரைகளை பெற்றிருந்தாலும் பெண்கள் இயக்கிய மற்ற சில சிறந்த படங்கள் இடம்பெறாதது ஹாலிவுட் திரையுலகினரையும் சினிமா ஆர்வலர்களையும் ஆச்சரியத்தில் ஆழ்த்தி இருக்கிறது.
